Citroën C5 skorar hátt í reynsluakstri AutoTrader

Bílablaðið AutoTrader reynsluók þriðju kynslóð Citroën C5 á dögunum og gaf honum góða heildareinkunn eða 81%. Öryggi og aksturseiginleikar hans hlutu bestu umsagnir blaðamannsins.

Augljóslega þýskur

Í útliti þótti C5 einkar myndarlegur og sóma sér vel sem arftaki fyrri kynslóða. Róttækustu breytingarnar voru taldar vera að aftanverðu þar sem ljósin líkist nú meira þýskri hönnun. Álitsgjafi AutoTrader var líka hrifinn af innréttingunni sem honum fannst einnig hafa aukin þýsk gæði innan- borðs. Hann tók þó fram að C5 væri enn trúr sínum frönsku rótum, þrátt fyrir að vera orðinn aðeins þýskari í útliti.

 

Betri en BMW

Blaðamaðurinn taldi notagildið hafa minnkað aðeins á kostnað betra útlits þar sem farangursrýmið væri ívið minna en í fyrri C5 módelum. Hann tók samt fram að 439 lítra farangursrýmið væri vel rúmt og að nóg pláss væri fyrir farþegana. Hann blés á alla gagnrýni um akstursánægju og sagði hana betri en í BMW. Blaðamaður Auto- Trader prófaði C5 með 2 l dísilvél og gaf henni einkunnina átta af tíu mögulegum.

Öryggi til fyrirmyndar

Í öryggismálum fékk C5 fullt hús stiga (10/10) hjá AutoTrader sem sagði allan öryggisbúnað bílsins til fyrirmyndar enda með fimm stjörnur í EuroNCAP prófunum. Annar staðalbúnaður fékk líka góða dóma og heildarniðurstaðan var sú að Citroën C5 stæði framar keppinautum sínum, hvað varðar þægindi og aksturslag.

Nánari upplýsingar

• Dómurinn í heild

• Meira um C5 á heimasíðu Citroën