Loeb hampar WRC titlinum í fimmta sinn

Franski ökuþórinn Sebastien Loeb hampaði um síðastliðna helgi sínum fimmta meistaratitli WRC heimsmótaraðarinnar í ralli. Loeb hafnaði í þriðja sæti í Japan-rallinu en það nægði honum til sigurs í heildarkeppninni enda hafði Loeb fjórtán stiga forskot á næsta mann fyrir keppnina í Japan. Árangur Loeb er einstaklega glæsilegur í ljósi þess að þetta er í fimmta skiptið í röð sem hann sigrar í keppninni.

Sigur fyrir allt liðið

Loeb, sem ók til sigurs á Citroën C4 bifreið sinni, sagði að keppninni lokinni að sigurtilfinning væri hreint stórkostleg. „Við settum okkur það markmið fyrir árið að vinna annan titil og það er einstaklega ánægjulegt að hafa náð því markmiði hér.“ Hann tók það fram að hann væri ekki eina ástæðan fyrir sigrinum og þakkaði öllu starfsfólkinu sem á bakvið hann stendur í gegnum súrt og sætt. „Það eina sem hefur verið eins, í öll þau skipti sem ég hef sigrað í þessari keppni, er sú ánægja sem fylgir því að geta deilt gleðinni með öllum í liðinu. Þau hafa alltaf afhent okkur bíl sem getur gert tilkall til sigurs og þetta er líka þeirra sigur.“

Keppni bílaframleiðenda ræðst á lokasprettinum

Þó svo að Loeb hafi tryggt sér meistaratitil ökuþóra þá er enn hörð barátta um titil bílaframleiðenda en þar hefur Citroën Total WRT níu stiga forskot á BP Ford Abu Dhabi WRT. Ljóst er að síðasta keppnin í mótaröðinni mun ráða úrslitum en sú keppni fer fram í Wales, 5.-7. desember.

Frekari upplýsingar:

Heimasíða WRC mótaraðarinnar