Rafknúinn Citroën C1

Fyrsti fjögurra sæta bíllinn í Bretlandi sem alfarið er knúinn rafmagni, Citroën C1 „ev’ie“, er kominn í almenna sölu. Nafnið er komið af skammstöfuninni EV = electric vehicle. Það er breska fyrirtækið Electric Car Corporation Plc (ECC) sem framleiðir bílinn en markaðssetning hans helst í hendur við þá yfirlýsingu bresku ríkisstjórnarinnar að hún hyggist styðja við og styrkja útbreiðslu notkunar rafbíla. Stefnan sé að Bretland verði leiðandi á heimsvísu í framleiðslu og útflutningi á rafbílum. Borgarstjóri London, Boris Johnson, hefur einnig tilkynnt að settar verði upp 25.000 endurhleðslustöðvar fyrir rafbíla víðs vegar um borgina.

Citroën C1 ev’ie er fyrsti fjögurra sæta rafbíllinn sem býður einnig upp á allan öryggisbúnað sem búast má við í venjulegum bensínbíl. Bíllinn fer 95-112 kílómetra fullhlaðinn og hámarkshraði hans er um 95 km/klst. Hann býður ökumönnum því upp á „venjulega“, en hljóða, akstursupplifun, með mun minni kostnaði.

Tilvalinn borgarbíll

Hægt er að endurhlaða C1 ev’ie bílinn að fullu á 6-7 klukkustundum í gegnum venjulega innstungu sem gerir bílinn tilvalinn borgarbíl til hvort sem er heimilisnota eða atvinnu.

Citroën C1 ev’ie er settur saman í Bretlandi og er meira en helmingur virðis bílsins fólginn í framleiðslunni þar. Hún skapar störf í landinu, auk þess að setja Breta í forystu hvað varðar framleiðslu rafbíla. ECC býst við að framleiða um 500 C1 ev’ie bíla næsta árið, og að sú tala hækki í 2000 til 4000 bíla árið 2010, en það veltur á eftirspurn og stuðningi stjórnvalda.

Xavier Duchemin, forstjóri Citroën í Bretlandi, segir framleiðandann ákveðinn í stefnu sinni um að framleiða vistvænni kosti fyrir ökumenn og það sé Citroën sérstök ánægja að sjá ECC fyrir Citroën C1 bílnum í þessum tilgangi.

Við þetta bætir David Martell, aðalframkvæmdastjóri ECC, „Við teljum þetta fyrsta alvöru valkostinn í stað bensín- eða dísilbíls. Aksturinn er eins og í bensínbíl og hann er vel búinn til aksturs í hvaða borg eða bæ í Bretlandi. Lykillinn að því að smíða góðan rafbíl er skilvirkt rafhlöðukerfi. ECC hefur búið til háþróað og vandað kerfi sem, í samvinnu við endurnýtanlegan hemlunarkraft, sér bílstjóranum fyrir mun meiri drægni og betri frammistöðu.“

Nánari upplýsingar:

• Frétt á vef Green Car Guide