Citroën hefur prófanir á tvíorkuútgáfu af WRC C4 rallakstursbílnum

Citroën C4 WRC tvíorku-rallakstursbíllinn var fyrst kynntur á bílasýningunni í París í október og nú hefur honum verið reynsluekið af liðsmanni Citroën liðsins í WRC mótaröðinni í rallakstri.

Í bílnum er lithium rafhlaða og 125kW rafmótor, auk hefðbundinnar bensínvélar. Bíllinn getur gengið fyrir sprengiorku á hefðbundinn hátt, eða rafmótorinn getur nýtt hreyfiorku bílsins þegar hemlað er í gír og hlaðið sig. Þá orku má síðan nota sem viðbótarorku þegar þörf er á aukasnúningsátaki. Hönnun Citroën gerir einnig ráð fyrir að hægt sé að nýta raforkuna á vegarköflum milli leiða í rallinu.

Undirbúningur fyrir vistvænni framtíð

Verkfræðingur Citroën, Didier Raso, segir bílinn enn teljast hugmyndabíl, en að framleiðandinn búi sig undir þann möguleika að notkunar vistvænnar tækni verði krafist í auknum mæli í WRC rallinu í framtíðinni.

„Citroën Racing vildi sýna getu sína til að aðlagast vistvænni tækni í rallakstri,“ segir Raso. „Ef kæmi til þess að reglurnar leyfi notkun tvíorkutækni, verðum við í stöðu til að bregðast strax við.“

Ökuþórinn ánægður með frammistöðu bílsins

Dani Sordo reynsluók bílnum á malbiksbraut í Faro í Portúgal eftir WRC keppnina þar á dögunum, og prófaði rafmótorinn einnig í almennri umferð.

„Þegar ekið er á raforku, getur maður keyrt hljóðlaust gegnum þorp, sem er afar óvenjulegt á keppnisbíl,“ sagði Sordo. „Það er vistvænna og einnig þægilegra fyrir starfsliðið.“

„Á keppnisbrautinni myndi ég segja að bíllinn hagaði sér aðeins öðruvísi en hefðbundni C4 WRC bíllinn, með meiri þyngd að aftan.“

Spánverjinn prófaði einnig raf„boost“-tæknina. „Þegar skotið kemur, eru áhrifin tilkomumikil,“ segir hann.

Nánari upplýsingar:

• Frétt á vef Autocar