Citroën er kominn fram með enn eitt djásnið; fallegan fjölskyldubíl, sem tilbrigði við C4. Nú C4 Picasso, vitnisburð um ótrúlega hæfileika hönnuða hjá Citroën til að koma fram með fallegar línur. Ekki aðeins er C4 Picasso glæsilegur í útliti eins og C4 Coupé og Saloon, heldur einnig afar rúmgóður, fjölhæfur og fullur af snilldarlegum nýjungum. C4 Picasso er fjölnotabíll fyrir fjölskylduna.

Þeir hjá Auto Express fóru nýlega í bíltúr og C4 Picasso með 2,0 l vélinni og voru þrælánægðir með þægindin, viðbragð vélarinnar og vinnsluna með 6 gíra hálfsjálfskiptingunni, eyðsluna og rýmið að innan, sem er yfirdrifið. Á markaðinn er einnig væntanleg 1,6 l díselvél sem gert er ráð fyrir að verði mjög vinsæl á meginlandinu.

Meðal hagkvæmra möguleika má nefna að unnt er að fella öll aftursæti alveg niður í gólfið með auðveldum hætti til að fullnýta flutningsmöguleika bílsins til hins ýtrasta. Úr verður 1.951 lítra flutningsrými. Þá eru ljós undir útispeglunum til að auðvelda aðgengi í myrkri og marft fleira.

Í nýlegum árekstraprófunum EuroNCAP-samtakanna fékk Citroën C4 Picasso hæstu einkunn, fimm stjörnur, fyrir öryggi ökumanns og framsætisfarþega og þrjár stjörnur fyrir öryggi aftursætisfarþega.

Sjá umfjöllun Auto Express HÉR.