Áhugaverð grein um nýja C4 Picasso

 

Í bílablaði Morgunblaðsins síðastliðinn föstudag má finna afar áhugaverða grein eftir Ágúst Ásgeirsson, blaðamann, um Citroën C4 Picasso sem væntanlegur er á næstu mánuðum frá Citroën. Greinina má lesa hér að neðan.

 

"HAFI manni einhvern tíma liðið eins og maður væri að koma sér fyrir í framsæti lítillar þyrlu við að setjast inn í bíl gerðist það þegar ég steig um borð í C4 Picasso, nýjan bíl sem Citroën-verksmiðjurnar frönsku setja á markað í janúar nk. Slíkt er glerið allt um kring og óhindrað útsýni fram, upp og til hliðanna, þótt rýmið sé mun meira í bílnum en þyrlu. Og það sem á eftir kom, sjálfur tilraunaaksturinn um fagrar sveitir í Suður-Frakklandi, var hrein unun. Ásamt því að vera listaverk að allri hönnun og búnaði virðist bíllinn eftir þau kynni ekki aðeins spengilegur og móðins heldur auk þess einkar meðfærilegur og stimamjúkur; fyrirtaks fjölskylduþjónn.

 

Að mati blaðamanna sem reynsluóku öllum fjórum útgáfum bílsins um síðustu helgi mun hann breyta öllum viðmiðum í flokki fjölskyldu- og fjölnotabíla (MPV). Ekki síst vegna frumlegrar hönnunar fellanlegra sæta sem gerir allar breytingar á rýminu aftan framsæta einkar fljótlegar og auðveldar. Sætin eru stillanleg hvert og eitt fyrir mjóhrygg og fjarlægð að framsætum. Búa þau farþegum meira fótarými en í öðrum bílum í sama flokki. Er miðröðin breiðari en í bílum keppinauta og nú jafngildir það ekki lengur refsivist að þurfa að setjast í öftustu sætin tvö, svo rúmt er þar til fóta og lofts í C4 Picasso-bílnum. Hægt er að fella sætin í mið- og öftustu röðinni með einu handtaki og fá þá allt að tæplega 2.000 lítra pláss fyrir pinkla á sléttu gólfi. Er það mjög létt verk, bæði fellingin og að setja sætin aftur upp.

 

Stjórntækin í stýrinu

Þegar inn í er komið vekur hreinlegt mælaborð athygli. Laust við stillitakka og stjórntæki sem nær öllum hefur verið komið haganlega fyrir á fastri miðju stýrishólksins sem snýst ekki með stýrinu. Á miðju borðinu er tölvuskjár með breytanlegum bakgrunnslit þar sem kalla má fram hinar ýmsu upplýsingar um starfsemi bílsins og búnaðar á mjög læsilegum mælum. Fjögur stór geymslurými eru í mælaborðinu og neðan þess. Meðal annars kælihólf þar sem myndast hefur rými við að nema burt gírstöng og handbremsu.

 

Ýmiss konar nýstárlegur búnaður gerir C4 Picasso bílinn frábrugðinn öðrum í flokki fjölnotabíla. Þar leikur ljósið stóra rullu því í bílnum að innan er frumlegur ljósabúnaður sem skapar þægilega stemmningu bæði að nóttu sem degi, í síðara tilvikinu í samspili við náttúrulegt ljós. Byggist lýsingin á ljósadíóðum sem komið er haganlega fyrir á 32 stöðum inni í bílnum m.a. við neðanvert mælaborðið, í hurðapanelum og lofti og dyrapóstum. Getur ökumaður stillt lýsinguna að þörfum og smekk. Þá flokkast það meðal þæginda bílsins að ljós undir hliðarspeglum lýsa upp jörðina í myrkri þegar farið er inn í bílinn. Og láta má aðalljósin lýsa upp heimreiðina í smástund eftir að slökkt hefur verið á bílnum og hann yfirgefinn og því engin þörf á að klöngrast heim að húsi í myrkri. Loks er hægt að fá bílinn með aðalljósum sem beygja með framhjólunum og lýsa því beygjur betur upp.

 

Sérstakur nemi mælir gæði loftsins inni í bílnum. Hann lokar snimmhendis fyrir innstreymi lofts ef óhreinindi og mengandi efni fara upp fyrir mörk og gangsetur um leið búnað sem endurvinnur loftið sem fyrir er í bílnum. Kemur þetta sér vel t.d. þegar staðnæmst er á gatnamótum fyrir aftan þunga reykspúandi bíla. Þá er sérstök loftræsting í afturhluta bílsins sem farþegar geta sjálfir stillt að eigin hentugleika og mun C4 Picasso vera eini fjölnotabíllinn sem búinn er sjálfstæðri loftræstingu í afturhluta bílsins. Loks er loftræstingin þeirrar gerðar að með því að þrýsta á hnapp má láta hana vera í gangi í allt að átta mínútur eftir að drepið hefur verið á bílnum og straumur rofinn.

 

Til að undirstrika þá hátækni sem C4 Picasso byggist á er í honum sérstakur stæðismælir sem segir ökumanni til um það hvort pláss milli bíla sé nóg til að hægt sé að leggja bílnum. Með því að þrýsta á hnapp og aka hægt (innan við 20 km) framhjá bili í bílaröð sem ökumaðurinn hefur augastað á, mæla sérstakir úthljóðsnemar plássið og gefa strax til kynna hvort það dugi til að leggja. Mun búnaður af þessu tagi ekki vera í öðrum bílum, að sögn Citroën.

 

Ökumaður hristur

Þá er og sjálfvirk bakkvörn í bílnum sem segir til um hvort hindrun sé í veginum þegar bakkað er. Bregður hún mynd af bílnum á skjánum á miðborðinu og afstöðu hindrunar. Taldist mér til að hún byrji að gefa frá sér tón þegar um tveir metrar voru í fyrirstöðu. Þá er í bílnum nýja öryggisbúnaður sem varar við þegar bíllinn reikar útaf akrein, til dæmis ef bílstjórinn byrjar að dotta undir stýri af þreytu. Hristir hún stól ökumannsins hressilega, ýmist vinstri rasskinn eða hægri eftir því í hvora áttina rekið er. Byggist þessi búnaður á infrarauðum skynjurum undir framstuðara sem nemur hitamun þegar ekið er út á hvítar línur, brotnar eða heilar, sem afmarka akreinar, eða möl eða gras ef bíl tekur að reka útaf braut.

 

Hefðbundin handbremsa er ekki í nýja Picassoinum heldur rafdrifin bremsa sem fer sjálfkrafa á þegar slökkt er á bílnum. Hægt er að setja hana á eftir þörfum með bílinn í gangi með því að ýta á hnapp fyrir framan mælaskjáinn. Allt í lagi er að gleyma að aftengja hana af því handbremsan er tengd gírkassanum og fer sjálfkrafa af þegar ákveðnu vélartogi er náð. Þá er bíllinn búinn sérstökum búnaði sem hjálpar til við að taka af stað í brekku með því að losa hann ekki úr bremsu fyrr en tveimur sekúndum eftir að fæti er lyft af bremsupetala. Hefur ökumaður því góðan tíma til að flytja fót sinn yfir á eldsneytisgjöfina og taka eðlilega af stað. Hefur hér aðeins verið nefndur hluti búnaðar sem ætlað er að auka á þægindi í akstri C4 Picasso.

 

Framrúðan er eins og gleiðhornalinsa, slíkt er útsýnið framundan, upp og til hliðanna úr framsætum. Í stað þess að lóðrétt sjónhorn sé 35 gráður eins og í hefðbundnum fjölnotabílum er það um 70 gráður í C4 Picasso. Þetta kann að þykja bagalegt í sólskini en fyrir því er séð með sérstöku tjaldi sem draga má fram og niður til að verjast mestu geislunum. Að meðtaldri sólrúðu ofan á þakinu og hliðargluggum, hvort tveggja hinu stærsta að flatarmáli í MPV-flokknum, er útsýni ökumanns og allra farþega einstakt. Bíllinn getur nánast verið einn gluggi "ofan mittis" með öllum valbúnaði. Fyrir vikið kýs Citroën að undirnefna hann "visiospace", eða "víðsýnisvagninn" ef svo mætti segja. Þarf vart að taka fram að kostir hinnar miklu framrúðu komu strax í ljós við aksturinn. Ákvað ég fljótt að aka ekki um fallegustu sveitirnar sem mælt var með sem ökuleiðum - þær bíða bara betri tíma - því ég vildi einbeita mér að akstri bílsins og kanna kosti hans.

 

Hægt verður strax frá byrjun að velja um fjórar útfærslur C4 Picasso-bílsins. Milli tveggja bensínvéla - 127 hestafla 1,8 lítra eða 143 hestafla með 2,0 lítra slagrými - og tveggja 110 og 138 hestafla díselbíla. Hægt verður að velja milli handvirkrar skiptingar og sjálfvirkrar, þ.á m. sex hraða rafeindastýrðrar sjálfskiptingar. Þær sjálfvirku má stilla þannig að ökuþór skipti sjálfur um gíra með blöðkum á stýrishjóli með nákvæmlega sama hætti og keppendur í formúlu-1. Engin kúpling kemur við sögu og þarf ekki að lyfta bensíngjöfinni; skiptingin á sér stað á nokkrum milljónustu úr sekúndu og verður því enginn yfirsnúningur á mótor. Fannst mér þessi útfærsla sérdeilis skemmtileg við tilraunaaksturinn og hún býður ökumanni upp á að láta eigin sérvisku við gírskiptingar ráða ferðinni í stað sjálfskiptingar. Undan sjálfskiptingunni er þó alls ekki að kvarta því hún var lítt sem ekkert lengur að skipta og reyndist í raun mjög skilvirk.

 

Handskiptingin á minni díselbílnum fannst mér hins vegar óþjál og að því leyti "ófrönsk". Að öðru leyti var meðfærileiki bílsins eins og hinna, en ég prófaði bæði stærri bensínbílinn og stærri díselbílinn og ók bílunum þremur rúma 300 kílómetra. Kunni betur við bensínbílinn með því að handskipta sjálfvirkum gírkassa. Fannst hann í þeim ham einkar sprækur og meðfærilegur á mjóum og hlykkjóttum sveitavegum - svipuðum íslenskum aðalþjóðvegum - jafnt sem krókóttum og bröttum brekkum. Díselbíllinn gaf honum þó eiginlega ekkert eftir, maður fann ekki fyrir stærðinni og meðfærileikinn slíkur að bílarnir voru eins og hluti af manni.

 

Loftpúðafjöðrun að aftanverðu

Margt reyndi ég til að prófa rásfestu þeirra. Sama hvað reynt var, aldrei tókst mér að fá bílana til að skríða út í beygjum að framan eða skvetta rassi, sama hvað hratt var farið inn í beygjur og bugður. Ekki einu sinni þótt raki væri sums staðar á vegum að morgni dags vegna úrkomu um nóttina. Það var ekki fyrr en ég fann malarkafla þar sem unnið var að vegarbótum en þá þurfti ekki nema létta mjög lítið á gjöfinni til að bíllinn biti sig aftur niður. Er hægt að hugsa sér eitthvað betra?

 

Við þessar tilraunir komu kostir góðrar fjöðrunar í ljós en að aftanverðu er loftfjöðrun undir C4 Picasso-bílnum. Álagsskynjarar í henni knýja dælur sem samstundis jafna dempunina þannig að dropi í hallamáli hefði líklega alltaf verið í miðjunni við aksturinn, svo vel virkar þessi búnaður í beygjum og bugðum og gerir ferðalagið fyrir bragðið þægilegt fyrir ökumann sem farþega.

 

Áberandi er hvað hljóðlátt var inni í bílunum þótt mótor snerist hratt en framrúðan er sérlega hönnuð til að tempra hljóð og hliðarrúður einnig. Á hraðbrautum með fulla sjálfskiptingu og forritanlegum skriðstilli fannst mér enginn bitamunur á bílunum. Nýlega lauk svonefndri Euro NCAP-öryggisprófun á C4 Picassobílnum. Niðurstaðan er sú að hann er fyrir fullorðna öruggasti fjölnotabíllinn á markaði, hlaut fimm stjörnur af fimm og 35 stig af 37 mögulegum.

 

Athygli vekur að Citroën ætlar að mæta til leiks með nýjan og verulega frábrugðinn Picasso á markaði þar sem nafni hans af Xsara-gerð hefur reynst mjög vinsæll undanfarin ár og selst vel. Hinn eldri er styttri og mjórri. Lengd milli hjóla nýja Picassoins er 2,73 m, heildarlengdin er 4,59 m, breiddin 1,83 m og hæðin 1,70. Að stærð er hann því mitt á milli eldri Picassoins og stóra sjö sæta fjölnotabílsins, Citroën C8.

 

Talsmenn Citroën segja að pláss sé fyrir þann nýja því C4-gerðin fylli bil sem hafi myndast milli minni og stærri gerða fjölnotabíla. Að sjá hann við hlið hins eldri virkar sá síðarnefndi - og reyndar margir aðrir fjölnotabílar - strax gamaldags. Líkast til mun nýi Picassoinn keppa um hylli neytenda við bíla eins og Volkswagen Touran, Opel Zafira, Mazda-5 og Ford C-Max.

 

Ég reyndi að fá talsmenn Citroën til að segja hvert verð bílanna yrði en þeir sögðu verðlagningu á mörkuðum utan Frakklands ólokið. Í Frakklandi mun dýrasta útfærsla bílsins með öllum valbúnaði kosta um 30.000 evrur, eða 2,6 milljónir króna á núverandi gengi, en sú ódýrasta um 20.000 evrur, eða rúmlega 1,7 milljónir.

 

Ekki botna ég alveg í nafngiftinni því hvorki er um að ræða C4-bíl né Xsara Picasso og tekur bíllinn nafna sínum fram að öllum gæðum. Byggist hann að vísu á undirvagni C4-bílsins og bíllinn ber nafn meistara málverksins með rentu, fegurðin blasir hvarvetna við; falleg hönnun og fáguð smíð. Niðurstaðan af tilraunaakstrinum er einfaldlega sú, að aldrei hef ég ekið betri bíl."