December 29, 2016

Hátíðarkaffi í Brimborg

Hátíðarkaffi í Brimborg

Komdu í hátíðarkaffi í Brimborg.

Brimborg fagnar góðu gengi

Brimborg lýkur metári með Hátíðarkaffi í húsakynnum sínum að Bíldshöfða 6 og 8 dagana 29. og 30. desember á milli klukkan 12-17. Þar gefst gestum og gangandi kostur á að njóta dýrindis kaffibolla frá Kaffitári og ljúfu góðgæti með.

Árið 2016 hefur verið einkar farsælt í rekstri fyrirtækisins. Velta félagsins fer í fyrsta skipti yfir 18 milljarða, metafkoma verður af rekstrinum og á árinu munu 3.000 bifreiðar verða nýskráðar af tegundunum Volvo, Ford, Mazda, Peugeot og Citroën sem er 38% vöxtur frá fyrra ári. Á heildarmarkaði kemur ríflega sjötti hver bíll frá Brimborg og á markaði án bílaleigubíla er hlutdeild Brimborgar 17,1%. Mjög góður gangur hefur einnig verið í sölu vörubíla, vinnuvéla, bátavéla og rúta frá Volvo ásamt því að met verður sett í útleigu bíla hjá Thrifty, Dollar og Saga, bílaleigum Brimborgar.

Veglegur styrkur til björgunarsveita

Brimborg hefur í gegnum árin átt farsælt samstarf við björgunarsveitir og til að mynda hefur Brimborg árlega styrkt Hálendisvakt þeirra fyrir erlenda sem innlenda ferðamenn.

Vegna góðs gengis á árinu hefur Brimborg ákveðið að styrkja björgunarsveitir Hjálparsveitar skáta í Reykjavík um 5.000.000 króna með flugeldakaupum. Skátar hafa selt flugelda til fjáröflunar frá árinu 1967 og sjá meðal annars um skipulag og framkvæmd stórfenglegrar flugeldasýningar á Menningarnótt sem öllum landsmönnum er kunnug.

„Styrkir frá fyrirtækjum eins og Brimborg eru afar mikilvægir okkar starfsemi til viðbótar við aðra fjáröflun björgunarsveitarinnar. Þessir fjármunir munu án efa nýtast afar vel í okkar mikilvægu starfsemi og varið í þágu landsmanna allra“, segir Brynjar Jóhannesson hjá Hjálparsveit skáta í Reykjavík.

„Aukinn ferðamannastraumur og aukinn fjöldi bíla í umferðinni á Íslandi kallar á enn meiri aðkomu björgunarsveitarmanna og álag á þá. Við teljum það vera samfélagslega ábyrð okkar að standa þétt við bakið á björgunarsveitunum enda afar mikilvægt að öryggi fólks í umferðinni sé ekki eingöngu tryggt með miklum og góðum öryggisbúnaði bifreiða heldur líka frábærum viðbrögðum og fyrirbyggjandi aðgerðum á landinu öllu“, segir Egill Jóhannsson, forstjóri Brimborgar.

Vertu hjartanlega velkomin/n í hátíðarkaffi Brimborgar 29. og 30. desember á milli klukkan
12-17. Við hlökkum til að sjá þig.